Outro exemplo de trasvases, desta vez requerindo moita máis precisión e control motórico, posto que había que trasvasar gotiñas de auga con goteiros e despois con xeringas.
Se vos apetece probade na casa, só necesitades o goteiro e un anaquiño de alfombra de baño, das antideslizantes.
Como vos dixen nunha anterior entrada, este curso estamos traballando por recunchos, sen dúbida, un dos que máis éxito está tendo, é o de sensacións, quizáis por novidoso.
Nesta ocasión os nenos e nenas están facendo trasvases de líquidos, unha actividade Montessori, incluida na actividades da vida diaria, na que se traballa a concentración, motricidade fina, coordinación óculo-manual, forza...
O video é un pouquiño longo, pero quería que poidades ver a maioría dos nenos facendo a actividade, tinximos a auga para que a actividade fose máis atractiva e que ademáis poideran ver mellor a auga que se lles caía por fóra.
As actividades Montessori normalmente fanse en espacios acotados, que lles axudan a unha correcta organización, neste caso unha bandexa con fondo blanco, é moi importante a orde e limpeza do material.
A xarra e os cuncos que utilizan son de cristal, polo que o peso é importante, e tiñan que ter moito coidado que non se lles caesen, fixérono xenial. Seguirán practicando para gañar en precisión, calcular canta auga deben botar nos cuncos para que logo non sexa tan difícil voltar a metela na xarra, prescindir dos embudos...
Pouco a pouco ensinarémosvos outras actividades de trasvases que podedes practicar na casa.
